СУКРОМНА МАТЕРЬСКА ШКОЛА КОЛЫСОЧКА

Пряшів ся оддавна поважує за културный центр Русинів і зістало то так і в сучасности. В Пряшові суть актівны вшыткы професіоналны русиньскы орґанізації, то значіть, Інштітут русиньского языка і културы Пряшівской універзіты в Пряшові, Театер Александра Духновіча єдиный русиньськый професіоналый театер на світї, Піддуклянськый умелецькый народный ансамбль і Словацькый народный музей – Музей русинськой културы в Пряшові.

Велё молодых Русинів штудує на Пряшівскій універзітї в Пряшові і кедь собі найдуть роботу, часто зістають як раз в Пряшові робити і жыти. Є ту основа про выхову і освіту русиньской інтеліґенції, зато собі думаме, же в Пряшові уже довше наростать потреба здобыти освіту про свої дїти в русиньскім языку. Окрем Інштітуту русиньского языка і културы на Пряшівскій універзітї в Пряшові не є в Пряшові іншой освітной інштітуції з навчалным языком русиньскым. Наша Сукромна матерьска школа Колысочка буде першов матерьсков школов з навчалным языком русинськым в Пряшові. Віриме, же русиньскы родічі з цїлого Пряшова і ёго околіцї можность записати свої дїти до першой русиньской матерьской школы в Пряшові рады схоснують.

выходять із абсенції русиньского школства в Словакії цїлково і в Пряшові окреме. Хочеме выбудовати модерну матерьску школу в краснїм оточіню соліварьского саду про русиньскы дїти. Зачнеме з єднов класов про 24 дїтей, но кебы ся вытворив інтерес про дві класы, маєме капаціты на розшырїня русиньской матерьской школы іщі о єдну класу.

Наша матерьска школа буде класічна в змыслї вшыткых штандардных освітных поступів про предшколску освіту, но нетрадічна в Пряшові буде основна функція нашой сукромной матерьской школы, а то тота, же учітелькы будуть з дїтми бісїдовати по русиньскы. Самособов, жe ся не выгнуть комунікації і в словацькім зыку, но переважовати буде русиньскый язык. Єдночасно бы сьме рады завели в нашій матерьскій школї і єден западный язык, наприклад кружок анґліцького або французьского языка – про старшы дїти. Будеме тыж отворены і дїтём з фіжічным постигнутём, бо єдна із нашых учітелёк, має освіту в области шпеціалной педаґоґікы. Но а што є главне, нашы учітелькы суть мілы і мудры жены, котры люблять свою роботу з дїтми і тїшать ся на них.